Matlhotlhapelo a go kgweetsa botlhaswa

Pele ga lefatshe la Botswana le simolola go nna le mefuta e mentsi ya dikoloi, ebile tse di lebelo la setsokotsane, dikotsi tsa tsela di ne di se dintsi go le kalo, mme ebile dikotsi tse di neng di diragala e ne e se tse di masisi go le kalo, kgotsa le fa e le gone go gapa matshelo tota. Mabaka e e ne e le gore dikoloi tse di neng di amega mo dikotsing di ne di sa taboga mabelo ape a a garolang pelo, le fa e ne e le base e tletse batho, e ne e kgona go wa fela ntle le go gobatsa bapalami go le kalo.

Fa dingwaga di ntse di fetoga, ga goroga dikoloi ka go farologana ga mefuta ya tsone, bontsi e le tse di bokiwang ka mabelo a tsone, fela jalo le dibase ga goroga tse di mabelo, tse di dinaka, fa dingwe e le tsa matlhatlhaganyane. Lebelo la dibase tse, la utlwala le bokiwa thata ke Batswana, bogolo jang ba ba dikgweetsang, ba bolela gore fa di setse di palama ditsela tse ditona tsa boA1, ga gona koloi epe e e sa tsogang sentle e e ka di emang pele.