Batlokwa ba koba basadi mo malwapeng

Dintwa tsa boswa di tswa kgakala di apere malwapa ka bontsi mo merafeng ka go farologana. Mme jaanong dintwa tse di gakatswa thata ke go palelwa ke go di rarabolola ga magosana a go bolelwang fa a tsaya letlhakore nako e ntsi fa ba reeditse dikgang tse. Mmegadikgang wa Naledi TEICHLER RANKOA a re dintwa tse tsa boswa di dintsi thata kwa Tlokweng kwa bana ba motho ba nnang fela ba remana ka dilepe fa pele ga makgotla a ditsheko go lwelwa boswa jwa batsadi ba bone fa ba sena go tlhokafala. Madimabe e nne gore magosana mangwe a Batlokwa gantsi a tsaya letlhakore la banna kgatlhanong le bokgaitsadiabone.