Go ya ka polelo e re e bonyeng, e ne ya re monogwaga ka kgwedi ya Mopitlo, Rre Lekang Motoane, a tlhongwa kgosi ya motse o. Ka tiro ga e ke e tlhoka mogolo go e tiisa moko, re utlwa fa Rre Tumelo Puleng, moemela kgosi yo mogolwane kwa Letlhakeng, a ne a le koo. Ga twe e rile a tswa la gagwe, Kgosi Puleng a re, o itumelela go bo tiro e, e akofetswe ya dirwa, ka go nyafala, go diegela tiro ya go nna jaana, gantsi go lere dikgotlhang.
Mme Kgosi Puleng a bo a ne a se nosi. Ba bangwe bagolo le bone ba bo ba ne ba le koo; go le Kgosi Kgari 111 kgosikogolo ya Bakwena. A re gakolole gore leina le, ke Kgosi Kgari 111, e seng Kgari Sechele 111 jaaka polelo e bua, le jaaka ba bangwe ba tle ba le bitse. Nnyaa, jalo ga le bidiwe sentle, ga le kwalwe sentle. A rotlhe re baakanye phoso eo. Gone kwa tirong ele, go bolelwa fa mogolo yo mongwe gape e ne e le Kgosi Puso Gaborone wa Batlokwa. Bobedi jo, jwa bo bo ne bo ile tiro ele, ka maemo a jone. Kgosi Kgari 111 a le koo e le Kgosikgolo ya Bakwena fa Kgosi Puso Gaborone ene a ne a ile ka maemo a gagwe a gore ke Modulasetilo wa Ntlo ya Dikgosi.
