Mme gape, a bidiwe dipapisapuo ka gore, a natefisa puo ka go e bapisa, ka go bapa nayo, e seng go e bua e tlhamala. Ka gone go bapisa puo mo, e re mafoko a, a dirisiwa, bangwe ba utlwe ba tlhaloganye, mme bangwe bone ba latlhege, ba se ke ba tlhaloganye se go buiwang ka sone.
E re fa Kgabutlwe a ka raya Dimenye a re, ‘Nnapela toise foo,’ ba eme tlhogo, ba hakgamale gore, toise e le tshipi, e le thata jaana, e ka napiwa jang. Gongwe ba bo ba ka ipotsa gape gore, yone toise eo, e napelwa eng, molato wa yone ke eng.