E ne ya re bosheng kamore ya mapodise ya bo e utlwala e na le modumonyana okare wa phokoje ka paka ya letlhafula, kgotsa phiri e sa tswa go ja morobana wa podi, mme ba ba neng ba utlwa modumo o, ba ne bas a itse sentle gore ke wa eng tota. Fela one ya bo e le wa botlhe ba ba neng ba sekile mme morago ba atlholwa dithupa di le nne mo maragong ka go dira melalo e e farologanyeng, bogolo jang ya botlhoka tsebe fela jwa banana.
Lekgotla la ga mothusa gosi ya Urban mo Gaborone, Sophie Radipati le ne la bolelelwa fa mosikisiwa Otsile Tolobu(26 dingwaga), e ne ya re kgwedi ya Seetebosigo e le malatsi a le lesome le bongwe, monongwaga a ne a itaya mongongoregi Moses Tlhowe ka diatla, a ba a mo gobatsa mo godimo ga leitlhola molema le mo mangoleng. Mokwalo wa lekgotla o ne wa bolela fa mosekisiwa, Tolobu, a ne a lwantsha mongongoregi kwa ntle ga marekisetso a Maruapula, mme ebile a dira jaana kwa ntle ga mabaka ape fela, go tlaleletsa bosupi jwa mongongoregi, pampiri ya bongaka e ne ya ntshiwa go bewa fa pele ga lekgotla, e supa dikgobalo tse di bonweng ke bongaka. E ne ya re mosekisiwa a sena go balelwa mokwalo wa lekgotla, a bolela fa a tlhaloganya molato o a o lebisitsweng sentle, mme erile a botswa gore a o ipona molato, a seka a wetsa lekgotla dingalo, ka a ne a bolela gore ka boammaaruri o ipona molalo.
