Mosekisiwa, yo o neng a lebega a tshwerwe ke kgakge mo lebokosong la bosekelo, o ne a tlhageletse jalo fa pele ga ga Mmakaseterata wa Letlhakane, Queen Moanga, go arabela molato oo, mo tshekong e e neng e tsamaisiwa ke lepodisi la maemo a Sejane la kampa ya Letlhakane, Ogone Motsholathebe, bosheng. E re ka mosekisiwa a iponye molato a bo a bolelela lekgotla gore o kgagotse madi ao ka ntlha ya gore o ne a betilwe ke pelo, o ne a balelwa mabaka a tsheko. Go ya ka mabaka a tsheko a a neng a balwa ke Sejane Motsholathebe, mosekisiwa o ne a ipiletsa matshwenyego mo kgweding eno e tlhola garataro kwa motseng wa gagabo wa Mmeya.
Gatwe pele ga mosekisiwa a kgagola P100 yoo ka letsatsi leo, o ne a tlhoka kutlwisisano le mongwe e leng Badueleng Kewetse. Ga twe mosekisiwa e ne e rile go le pele a laela Badueleng Kewetse (Mongongoregi) gore a mo rekisetse phane. Ka jalo mongongoregi o ne a tsaya phane a ya go e rekisetsa ba lebentlele la TAPEDZA mo Mmeya mme ba mo duela ka lekgolo la dipula (P100 yo o pataganyeng). Ga twe mongongoregi, Badueleng Kewetse, o ne a boela kwa lelwapeng mme a fitlha a neela mosekisiwa P100 yoo wa thekiso ya phane. Gatwe mosekisiwa o ne a botsa mongongoregi gore o rekisitse phane efe, a o rekisitse e e neng e le mo teng ga ntlo kgotsa e e neng e anegilwe kwa ntle ga ntlo? Foo go tlhaloswa jalo gore mongongoregi o ne a bolelela mosekisiwa gore o rekisitse phane e e neng e le mo teng ga ntlo eseng e e neng e anegilwe kwa ntle.
