Naledi e ne ya batla go itse gore dilo tsa bogologolo tse a bonang di santse di ka dirwa ke dife, mme a re,“Nnyaa, kana dilo tsa bogologolo gatwe di fetile, le Baebele ya rialo. Mme tota di ne di na le boleng. Kana bogologolo e ne ere fa ngwana a sa dire sentle a kgalemelwe. O ne a itewa. Bogologolo re ne re sa itse gore a ngwana wa mosetsana o ne a ka lala nageng a tsoge a tla kamoso go le motshegare go sa itsewe kwa a tswang teng. Re ne re sa itse gore a ngwana wa mosetsana go ka itisiwa ga bo ga robalwa go sa itsewe kwa a leng teng. Le yone redi le koi, e ne e re le phirima o bo o alela mmago, o ikalela. Re ne re tshameka mo sebateng, re sa tshamekele kgakala. Gompieno gatwe bana ba na le ditshwanelo ga ba buisiwe. Fa o raya ngwana o re o letse kae o a tenega, o ya go ipolaya. Mme ga go a siama. Ngwana o tshwanetse gore a kgalemelwe fa a sa dire sentle a bontshiwe tsela ya boammaaruri. Le o re o bua le ngwana a re o a omana. Mme rona re ne re kgalemelwa. Motho a ogole legong mo isong a go alole ka lone. Gape ga o ngale, o a tsamaya o kotama fale o lela. Gompieno ke tshupamhatelo fela. Bana ga ba rutwe sepe. Fa o raya ngwana o re nnosa, o go neela kopi a bo a tswa a tsamaya. A jaanong kopi e o ye go e baya kampo o reng? Dilo tse ga diyo gompieno,” Mme a lela ka thswanologo e a e bonang.
Mme ke seopedi se segolo, ka kopelo ya gagwe a re, “Ke ne ke le leCheche la khwaere. Le gompieno ke ntse ke a opela. lentswe la me ga le ise le nyelele thata. Le fa jaanong le tsofala, ke santse ke opela sentle fela. Re ne re rutwa ke Sefentse go opela. Jaanong ka gompieno go tlile bananyana fela mme ke ntse ke go rata thata go opela. Ke goletse kwa Lontone, le difela tsa Lontone ke di itse fela jaaka tsa Cheche. E bile tsa Cheche ga ke di itse ka bontsi. Le ka tlhogo ke ka go opelela sefela ka bo ka se fetsa. Le fa ke le nosi ke a opela. Le fa ke reeditse radio ba opela difela, ke opela nabo.”
