Mosweu o tiisa ba kirikete moko

Fa ba buisanya le Naledi mabapi le se, bagolwane le bakatisi ba motshameko o, ba boletse fa go isiwa dithutong kwa ntle ga Botswana ke lekgotla la metshameko la Botswana(BNSC) gaga Mosweu e tlaa nna ditso tse di tlaa nnelang ruri. Ba bua jaana ka boitumelo ba bolela fa Mosweu ele motshameki wa ntlha wa kirikete go tswa mo Botswana go rotloediwa ka madi ke lekgotla le.

Mookamela lekgotla la Botswana la kirikete, Girish Ramakrishna, o boleletse Naledi fa go sena sepe se se kileng sa tlatsa pelo ya gagwe ka boitumelo go gaisa go rotloediwa ga motshameki wa kirikete go ya dithutong kwa ntle. A re se se tlaa thusa thata go baya lefatshe leno mo mmepeng o wa kirikete, bogolo jang ka motshameki yo, Mosweu, ele naledi ya boammaaruri.