Mosadi mongwe wa Bokaa, Marea Moseki a re o ne a iphitlhela a latlhegetswe ke moratiwa wa gagwe morago ga go mmona metsa dipilisi tsa madi a matona, tse rre wa gagwe a neng a ithaya a re ke tswa mogare wa HIV le bolwetse jwa AIDS.
Fa a bua le Naledi ka Labobedi kwa Bokaa, Moseki wa dingwaga tse 36 a re o ne a fereiwa ke lekolwane la marata go lejwa, le e rileng le tshela bosae phefong go ipala mabala a kgaka, a seka a tlhola a le diya ka go le isa kwa le kwa, mme a le amogela ka pelo e e tletseng boitumelo, bogolo jang ka a ne a ntse a huhumela dikobo a le nosi sebakanyana. Moseki a re fa lerato la bone le ntse le oketsegelwa ke malatsi, o ne a dumela gore moratiwa wa gagwe a mo jele nala kwa gabone kwa Bokaa kwa mosepele wa go tiisa lorato o neng o tshwanetse go simolola teng ka letsatsi leo. A re bosigo ba ne ba robala jo bo monate thata bogolo jang mo go ene ka a ne a ikutlwisa go patiwa mo kamoreng e e lefifi, ditlotlo le tsone e le tse di haphegileng tsa batho ba ratana la o-kaa-swa-nka-go-ja.
