Monna wa Rakops kwa Boteti o ne a leba jalo ka leitlho le le mosoka a bo a ganetsa mohemo wa gagwe fa pele ga lekgotla la ga Mmakaseterata la Letlhakane beke e e fetileng, a batla go itse gore pele fa a tlhatlhobiwa go ne go tlhatlhobilwe baa le kae fa pele ga gagwe. Mosekisiwa o ne a ntse disanyana fa pele ga ga Mmakaseterata Keneilwe Koobake mo tshekong e e neng e tsamaisiwa ke Inspector Mofffat Seakonyane wa sepodisi sa Botswana go tswa kampeng ya Rakops. Mosekisiwa o lebisitswe molato wa go kgweetsa koloi a nole bojalwa ka selekanyo se se sa letlelesegeng mo molaong wa Botswana. Go ya ka fa tsheko e thailweng ka teng mo kgotleng, mosekisiwa o ipileditse matshwenyego mo kgweding eno e le masome mabedi le bosupa mono ngwaga. Ga twe ka letsatsi la tiragalo o ne a kgweetsa koloi ya modiro wa MAHINDRA, B 930 ARJ mo Rakops.
Ga twe o ne a wela mapodisi fa sekganeding sa tsela mme ya re fa ba mo atumela ba kgatlhantshiwa ke monkgo wa bojalwa mme ba belaela gore o nole bojalwa a kgweetsa. Ka jalo ba felela ba mo isitse kwa kampeng go mo tlhatlhoba mme ga fitlhwelwa a nole bojalwa ka selekanyo se se fetileng se se letlelesegang; gatwe o ne a nole ka selekanyo sa 1.07 mg/L fa molao one o letla 0.22 mg/L. Morago ga seo mosekisiwa o ne a tlhagisiwa, a lebisiwa molato a bo a gogelwa lekgotleng go o arabela. Ka letsatsi la tsheko ba bosekise ba ne ba bitsa basupi ba le bane ba ba akaretsang motlhotlhomisi wa kgang le baitseanape ba kwa matlhatlhobelong a sepodisi go fa bosupi kgatlhanong le mosekisiwa. Le fa mosekisiwa a sa ipona molato, fela o paletswe gotlhelele ke go thamathamisa basupi ka dipotso.
