Maina a a biditswe ke mang?

Mo dingwageng di le dintsi thata tse di ntseng di feta, motshameko wa kgwele ya dinao mo lefatsheng la Botswana, o supile kgolo e e itumedisang, jaaka ditlhopha di ntse di lwela bosimega jwa dikgaisano ka go farologana ga tsone. Le yone tlhwatlhwa e e lwelwang ya madi e le e e botoka ka e setse e tshwara didikadike tsa dipula.

Fa ditlhopha di ntse di lwa jaana, barati le balatedi ba tsone ba ikgantsha thata ka tiro e ntle e ditlhopha tsa tsone di e ba direlang, ke seo bontsi jwa sebaka go utlwalang maina a ditlhopha tse a a di retang, jaaka kwa Township Rollers gantsi go utlwala thata leina la PopaPopa kgotsa Mapalastina. Fa o utlwa balatedi ba Rollers ba bitsa maina a, o itse fela sentle gore e a bo e letsa moretlwa go utlwala mo go tse dingwe, bogolo jang diselammapa tsa kgwele ya dinao ya Botswana.