Morago ga go dumalana gore BoBA e leke ka bojotlhe go isa mabole kwa Batswaneng, go sa kgathelesege gore ba bokgakala bo kae, dingwaga fela di le mmalwa, mabole a setse a gorogile kwa mafelong a a kgakala le ditoropo. Moanamisa mafoko wa BoBA, Kenney Maragana, a re erile fa ba tsena mo boeteledipeleng jwa lekgotla le, moeteledipele wa lone Thato Patlakwe, a bolela fa go le botlhokwa gore mabole a ntshiwe mo ditoropong go ya kwa dikgaolong tse di kgakala. A re o ne a bolela gore motshameko o, ke o o pharologanyo ka mongwe le mongwe a ka kgona go o tshameka ntle le bothata bope jaaka e mengwe. Maragana a re mme le bone e le maloko a komiti le bakatisi, ba ne ba tsaya mafoko a a ga Patlakwe ka diatla tsoopedi. Mme ba ralala Botswana go ngoka Batswana botlhe ba ba eletsang go tsena mo motshamekong o.
A re gore go nne bonolo, ba ne ba bona go le botlhokwa go simolodisa ditlhopha tsa kwa dikgaolong, ka se se ne se tla a neela banni ba dikgaolo le metse sebaka sa go inaakanya le one kwa ba leng teng. A re ba ne ba dira jaana ka go bo go ne go se bonolo gore bangwe ba ka tswa bokgaleng go ya ikatisong ya mabole kwa ditoropong ka go le kgakala, ebile le madi a dipalamo a le thata go bonwa.
