Jaaka e le maikemisetso a lekgotla la banka ya First National ya Botswana (FNBB) go thusa baithuti ba dikole, e ne ya re beke ee fetileng ba etela kwa sekoleng se sebotlana sa Kgomodiatshaba kwa Kgatleng go abela baithuti ba sone ditlhako tsa sekole.
Fa a bua kwa kabodimphong kwa sekoleng se sa Kgomodiatshaba, mogolwane wa FNBB kwa mmolong wa Airport Junction, Gadifele Kgosidialwa, o ne a bolela fa thuto e tla pele mo botshelong jwa segompieno. A re baithuti ba tshwanetse go itse gore gompieno tiro nngwe le nngwe ee duelelwang e tlhokana le gore mmereki a bo ana le thutego e e rileng, ka ope fela yo o sa tsenang sekole go nna thata gore a bone tiro e a e ratang. Gore se se kgonafale, Kgosidialwa a re baithuti ba tshwanetse go tlhwaafalela thuto ya bone, ba seka a itewa tsebe ke sepe, ka ba simolotse go betla tsela ya botshelo. O tladitse ka gore thuto e batla moithuti yo o matlhagatlhaga a sa kgorelediwe ke sepe, go sa kgathelesege gore a ke se a se itlhophelang kgotsa tlholego. O ne a bolela gore thuto ya bana e tlhoka go tshwaraganelwa ke batsadi le barutabana. Seane sa Setswana se bolela gore kgetsi ya tsie e kgonwa ke go tshwaraganelwa, eleng seo a reng o kopa batsadi botlhe go ema ka dinao go tlhomamisa gore bana ba bone ba tlhwaafalela thuto.
