Dipitse di ne tsa tsena mo lebaleng di tlhotsa kgatlhanong le Comoros ka Sontaga ka di ne tsa ipona fela di palelwa ke go raga Comoros botlhoko kwa ga yone ka Laboraro, mme se sa hutsafatsa Batswana thata go bona Comoros e di rema maoto ka nno e le nngwe go lefela. Barati le balatedi ba Dipitse ba ne ba batla go tlelwa ke itlhobogo ya gore setlhopha sa ga mokatisi Peter Butler se ka tlhola se dira sengwe mo kgaisanong e se tshamekang mo go yone e.
Ba ne ba itlhoboga jaana ka tota ba tsaya fela gore mafatshe a a tshwanang le Comoros ga se a motshameko wa kgwele ya dinao, e le fela a ba solofelang gore ga a kopana le Dipitse di tshwanetse go raga go utlwala go kokoanya dintlha tse di botlhokwa ka one. Go utlwa fela gotwe Dipitse di robilwe maoto ke Comoros go ne ga dira gore Batswana ba letele legato la bobedi ba sulafetse mowa, ba ikgomotsa fela ka gore malatsi ke a paseka ba tla a ikgomotsa ka tsoga ya ga Morena Jeso Keresete.
