Dikgaisanyo di thusa bakatisi

Fa a bua le Naledi mabapi le kgaisanyo e e neng e tshwerwe kwa mabaleng a kirikete a Botswana, mogolwane wa lekgotla la Botswana la kirikete (BCA), Girish Ramakrishna, a bolela fa gantsi BCA e tshwara ikatiso ya ditlhopha tsa setshaba ka go farologana ga dingwaga tsa batshameki. A re ikatiso e e rulaganngwa ka maikaelelo a go baakanya batshameki ba ditlhopha tse, gore e re ba tsena mo dikgaisanyong tsa mafatshefatshe ba bo ba le mo seemong se se siameng go ka mekamekana le balekane ba bone.

Mo godimo ga ikatiso e, Ramakrishna a re ba tshegetsa dikgaisanyo tsa ditlhopha tsa lefatshe la Botswana ka go farologana ga dikgaolo tsa tsone, tse a reng le tsone di tshwarwa ka maikaelelo a go kala seemo le tshameko ya batshameki ba tsone.