Setlhopha sa Botswana se tsene mo kgaisanyong ka maikaelelo a go romela molaetsa wa tlhagiso mo ditlhopheng tsa mafatshe a a sele. Se se ne sa se tiisa moko go fenya metshameko e le mentsi go se tsholeletsa kwa maemong a a kwa godimo. Kgaisanyo e ne e tsenywe ke mafatshe a Lesotho, Namibia, South Africa, Malawi, Mozambique, Swaziland le Botswana go dira palo gotlhe go nna bosupa. Zimbabwe e ne ya seka ya iponatsa.
Mogolwane wa setlhopha sa Botswana, Gaone Basiamang, a re kgaisanyo e ke yone e e thusang thata gore setlhopha se ipaakanyetse dikgaisanyo tse di kgolwane tsa mafatshefatshe. Ke sone seo a bonang go le botlhokwa gore di ne di tshegediwa gantsi. Basiamang a re o itumeletse ka fa batshameki ba gagwe ba dirileng sentle ka teng. A re mafatshe a ba neng ba tshameka nao a setse a na le dingwaga di le dintsi mo motshamekong wa kirikete. A re go bona bana ba gagwe ba kgonne go emelana le mafatshe a go supa fa lefatshe la Botswana le gatetse pele mo motshamekong o. Basiamang o ne gape a bolela fa ba itumeletse go fenya lefatshe le le thata ebong Namibia le le tseelwang kwa godimo thata mo motshamekong wa kikrikete.
