Borogo bo letsa Mokhanselara

Fa a buisanya le Naledi ka seemo se sa go lofela sekole ga baithuti ba sekole se segolwane sa Odima, ka ntlha ya pula, mokhanselara Ncube o tlhalositse gore se se bakwa ke gobo borogo jo bo kgaoganyang metse ya Matebele le Oodi bo le bonnye ebile bo le kwa tlase thata.

A re ka ntlha ya se fa pula fela e e seng ya sepe e na, metsi a bo tlola fa godimo, mme go se nne ope yo o ka tlolelang ntlheng e nngwe ya noka ya Ngotwane. Ncube a re e le bagolo le baagi ba Matebele ba setse ba itse fela gore fa dipula di simolola go na, baithuti ba ya go sokola go le kae. A re ga a itumedisiwe gotlhelele ke go bona maduo a bana ba Matebele a tswelela ka go wela tlase. Mme ese ka go bo ba tshameka, mme tota e le ka go lofela sekole ka ntlha ya borogo. O ne gatelela thata botlhokwa jwa gore khansele e tsibogele go aga borogo jo botona gore metsi a seka a bo tlola fa godimo go kgoreletsa metsamao ya baithuti fa baya sekoleng le ditiro tsotlhe tsa baagi ba Matebele le Oodi ka gope.