Mme fa e kare go setse dimithara di se kae fela, nngwe ya tsone ya tsipoga kgotsa ya robega, kgotsa ya fatlhiwa ke sengwe, go ile fela ka yone, lebelo le lone le fetoga la dipitse di le pedi. Se ke se go lebegang se diragala ka liki e kgolwane ya beMOBILE ya lefatshe la Botswana, e Orapa United e samileng Township Rollers molala go leba kwa moleng wa bosimega morago ga go bonya ga Mochudi Centre Chiefs ka Matlhatso bosigo.
Liki e ya beMOBILE e setse fela ka metshameko e le metlhano setlhopha sengwe le sengwe morago ga gore ditlhopha di le lesome le borataro di e kgologele ga e simolola go gwetlha bosimega jwa yone, ka tota go tshwanetse go nne le bagaisanyi ba ba tlhwaafetseng ya itumedisa thata go bona ditlhopha di le tharo di lwa ntwa e e boifisang. Ntwa e ya go supa tlhwaafalo ya ditlhopha tsa basireletsi ba liki, Mochudi Centre Chiefs, Township Rollers le Orapa United e ne ya dira gore barati le balatedi ba motshameko wa kgwele ya dinao ya lefatshe la Botswana, ba bule matlho go bona, ba bule ditsebe go utlwa gore ke se fe setlhopha mo go tsone se se itlhomileng kwa setlhoeng sa loko mafelo a beke nngwe le nngwe.
