Mmua-lebe

Etlaa re gompieno re boe re etele Naledi gape. Fa re latlhela matlho mo go yone, re kopana le kgang e e buang ka loeto lo mongwe wa bakwadi ba yone a kileng a lo tsaya go tswa mo Gaborone go ya kwa motseng mongwe o o bidiwang Dikwididi kwa Kgatleng (Naledi 20 Tlhakole 2013)

Mokwadi wa polelo ya rona a re o ne a tsaya loeto lo go ya go lekola botshelo jwa batho ba motse oo, le go bona ka fa ditlhabololo di tsweleltseng ka teng koo. Go bolelwa fa mosepele o ne wa simologa o le monate go tswa mo Gaborone go ya go tsena Modipane. Mokwadi o bolela fa loeto lwa gagwe lo ne lwa simolola ka nako ya bone mo tshokologong, mme ya re go ise go ye kae, a bo e bile a fetile Oodi a lebile Modipane. Ga re utlwe go bolelwa sepe ka metse e mengwe e mokwadi a fetileng ka yone mo tseleng.