Dikgwa di a nyelela-FCB

Mo potsolosong le Moanamisamafoko wa FCB, Lorato Mongatane, ditshekatsheko di supile fa dikgaolo tsa Ngami le Chobe ele tsone tse di amilweng thata ke go nyelela ga dikgwa bogolosegolo mo magareng a dingwaga tsa 2001 le 2012. A re mabaka mangwe a a rotloetsang go nyelela ga dikgwa ke melelo ya naga e gantsi e sa laolesegeng, go saila ga ditlou gongwe le gongwe, ditlhabololo tsa ditsela le go runya ga masimo gangwe le gape. Mongatane a re seemo se se baka gape kgotlhego ya lefatshe, e mo tsamaong ya nako e ka bakang go huduga ga diphologolo le go amega ga ditlhare le maungo a naga.

Mongatane o tsweletse a re go tsibogela seemo se, FCB e itebagantse le go thusa ka madi makgotlana aa ikemetseng ka nosi (NGOs), dikomiti tsa ditlhabololo tsa metse (VDCs) le makgotla a merafe, (Community Trusts) a a itebagantseng le go somarela tikologo, go tlhokomela le a go tsosolosa dikgwa tsa Botswana.