Carter Morupisi o dirile dikgakgamatso kwa Malaka :: Mmegi Online

Go ne go osha legong go sala molora ka Labotlhano wa Phatwe ale 28 (28-08-2015) kwa motsaneng wa Malaka kwa botlhaba ja Palapye kwa sekolong sa motse oo. Mokwaledi Mogolo wa ofisi ya ga Tautona Rre Carter Morupisi o ne a dira ditso tse di senang go lebalwa.

Rre Morupisi o ne a supiwa fa pele ga barutabana, batsadi le bana ba sekolo fa e le ene yoo ikemiseditseng go thusa sekolo seo ka tsotlhe mo lenaneong la ‘Adopt-a-School’. Moletlo oo wa maemo oo neng o rulagantswe sentle ke barutabana ba sekolo sa Malaka Primary o ne wa simologa mo mosong wa Labotlhano go fitlha mo maitseboeng.

Gareng ga batlotlegi go tswa kwa dikomponeng tse di farologaneng, badirelapuso, kgosi ya motse Rre Dikakanyo Otukile le batho ba kgaolo eo ba ba neng ba tlile mo moletlong oo, go ne gole mopalamente wa Palapye/mothusa-tona Rre Moiseraele Master Goya yo ebileng e ne ele sebui sa tlotla. Mo mafokong a gagwe Goya o ne a akgola Morupisi a bo a mo galaletsa thata mo maitlamong a gagwe a go thusa dikolo tseo.