Bosheng jaana, lekgotla la BONEPWA+ le ne la rola pego (Stigma Index Survey Report) morago ga go dira dipatlisiso tsa go kala seemo sa lekgobo le kgethololo mo batsheleng le mogare mo lefatsheng leno. Ka dithuso tsa lekalana la UNAIDS, NACA, UNDP le Lephata la Botsogo (MoH) pego ya dipatlisiso e ne ya rolelwa banaleseabe kwa bokopanong jwa mafatshefatshe jwa go lekola maiteko a go lwantsha HIV le AIDS kwa Australia ka 2012, mme morago la rolelwa maloko a BONEPWA kwa Tonota, ngogola ka letsatsi la mafatshefatshe la go lwantsha AIDS (WAD).
Pego e ya go kanoka lekgobo, e supa gore ere ntswa le fokotsegile lefatshe ka bophara, go santse gona le dikgang fale le fale. E supa fa lekgobo le tsweletse ka go ama maiteko a go rotloetsa Batswana go tsena mananeo a diritibatsi tsa mogare le go ama maiteko a bao ba ba tshelang le mogare go ikamogela mme ba iphitlhe ka motsikiri (internalized stigma). Dipatlisiso di supa gape fa go santse gona le batho ba ba tsweletseng ka go sebaseba le go mataretsa bangwe lebadi la ka fa ba ka tswang ba amilwe ke mogare ka teng. Batshelalemogare bale 471 mo go ba ba 1231 ba supile fa ba kgobotlilwe ka ditshebo, ngwaga pele ga dipatlisiso di dirwa. Bale 231,ba boletse fa ba ne ba rogakakiwa ka seemo sa bone. Bale 121 ba re ba ne ba kgokgontshiwa ka go itewa ke bakapelo ba bone mabapi le seemo sa bone.
