Balatedi ba tshwenyegile ka BR Highlanders

Setlhopha sa BR Highlanders ka nako e se duba thankga kwa go tse di kwa tlase mo moalong wa liki ya Be Mobile go leka go falola selepe sa magagane. Pele ga malatsi a keresemose le ngwaga o mosha ba ne ba kgaogana le mokatisi wa bone, Tebogo Mokute, mme mothusi wa gagwe Lebitso Ratlou, a nama a kotame setilo seo ka nakwana.

Kgang e e simolotswe kwa lefelong lengwe la itloso bodutu le bidiwa Seduda Lodge fa balatedi bangwe ba tshwere kgang ya moruthutha ka gore gongwe ke nako ya gore ditlhopha tsa Mahalapye tsa kgwele ya dinao di ikopanye go dira setlhopha sele sengwe. Bangwe ba ne ba ntsha mabaka a gore ebile ke gone go ka bopiwang setlhopha ka batshameki ba tlhwatlhwa le gone go bopaganya ditsompelo.