Ba Chanoga ba boela maropeng

Ditiragalo tse di tlaa tshwarwa ka mafelo a beke a kgwedi eno e le masome mararo. Go tlhalositse jalo monnasetilo wa komiti ya ditlhabololo ya motse wa Chanoga, Kewame Mooketsi. A re go tlaabo go sha legong go sala molora. Mooketsi a re moletlo o tlaa tshwarelwa kwa Chanoga dikhilomithara dile masome mararo kwa botlhabatsatsi jwa Maun. Mooketsi o tlhalositse fa maikaelelo a batho ba kgaolo e le go tsosolosa ngwao e bareng e lebalesegile. A re ba kopantse ditlhogo go tswa ka maano a a ka busetsang ngwao ya bone mo kgaolong mme ba bona go tshwanetse go batla letsatsi la go ipelela ngwao.

Mooketsi a re lerole le tlaa bo le beta kolobe kwa dikagong tsa bogologolo tsa kokelwana le sekolo kwa nokeng. A re go dira jalo gape ke go gakolola basha ka ditso tsa Chanoga ka bontsi bo sa itse fa dikago tsa mofuta oo di kile tsa dirisiwa go aga bokamoso jwa bana ba Chanoga.