Ke tla tlhwaafalela Naledi, salang sentle!

Ke ne ka laelwa ke modisa dikago go palama mochini (lift) o o pegang batho go tlhatlogela kwa godimo. Mme mo matlhatlaganyaneng ao, kwa go a boraro, ka kopana le batho ba bantsi. Bangwe ba ne ba tsena, bangwe ba tswa, bangwe go lebega e le badiri ba Mmegi, kana babega dikgang, ka ke ne ke bona ba tshotse dibukana le megala ya letheka e megolwane (Tab). Ka amogelwa ke mme mongwe fa go arabelwang megala teng, mme fa a impolelela, a re ke ene Nango.

Ditlotlo tsa nna teng, a ntira gore ke amogelesege. Go ise go e gope, rre mongwe a tla go nkopantsha gone foo, a inkitsise, a re ke ene Zolani Kraai. Ka tebo ya matlho, o ne a lebega e le motho yo o sudileng sefatlhego, e bile a le bogalenyana, mme letsatsi leo, a nkamogela ka menyenyo. A mpontsha fa ke tlaa berekelang teng, a bo a nkitsise le badiri ka ene.