Leboko la ga Tautona Quett Masire ka Rre Sekokotla Kaboeamodimo
Correspondent | Wednesday June 28, 2017 17:40
Tlhwaang ditsebe matona a puso,
Lo tseye lotlhokwa lo lo robaganye,
Lo robe lotlhokwa go fata ditshoka,
Lo utlwe ke golodika phalafala
Ke boka phiri e thamaga matshana;
Ntla Rre Joni o ka ba a sa tshedile,
Ke raa le mme Mma Ketumile.
Ba koo ba utlwa mangwe matlhomola,
Ba utlwa ke tsotsonka sebatana
Tiba-ka-nkoto wa ga Mma Khwete,
Ka-nkoto wa ga Mma Ketumile.
Kgomo e tiba ka tlhako ya morago,
Mongwe e tlaa lala e mo ragile.
Ema o katlowe monna Sebotho
O ko o katlowe o e re gamele.
Phiri e rakile kwena letsibogo.
E rile kwena e ile dikgofeng,
Se ile sa kgabaganya sebatana,
Ka utlwa e galaotega thamaga
E bopa kwa letšheng la Sehikile.
E bopa e tlhalosetsa Barolong.
Ka bona ba itumela Barolong,
Banna ba borwa ka utlwa ba tshega.
Ba tshega ba itumelela mafoko,
Ka ba ne ba utlwa dikgang tsa puso,
Ke raya go itumela Motlhatlhedi,
Tshipikgano a tshega a ba a lapa.
A tshega ka e le moana-sebata
E le mosimane oo Kgano-a–nacwana.
Batho e rile ba ile go siana,
Ke raya ba ile go tlhoma lobelo
Ba bile ba ile go ja matsomane,
Sa feta se galaotega sebatana
Ka se ne se ile go tlhoma sekhukhu.
O se tlhomile kwa Tshidilamolomo.
Mmina-kwena a tla a iphotlhere
A tla a lela a sa kgweetse sepe
A lela fela a ithwele megono
A bua ka madi a tletse ganong
A re dithaga tseo di mo jetse a ntse a leta
‘Ke nke ke tlhalosa ke ya kgakala
Ke tlaa bua fela go le gonnye
Ba gaetsho ba nkitsa go go boka
E a re ke bolela thata ya gago
Ba re ga ke boke ke ‘ira bolope
Mme tota gone ga ba nkakele
Motho a boka o itatswa mabogo
A boka motho o marapo a thata
A boka motho a okame lefatshe
A okame Botswana bo le mmogo
O mphile kgomo Mo-ana-sebata
O mphile kgomo ka ba ka e thiba
Kgomo tshunyana e mabele a thata
Tshunyana e mabele a diphogotlha
E kwa ga Ra-Monnedi e fiwa letswai
Le tlhakantswe le bopi jwa marapo
E a re e gangwa ntšwa di bogole
Mosadi wa a ka a lale a kgotshe
E gamelwa Mme MmaKeneilwe
Basimane bame ba e mo gamele
Metlhose o e gama ‘sigo bo sele
Ke raya a e gama ‘tsatsi le penne
Malomatsebe a itsa morole go tswa
Nne ke sa boke ke a okaoka
Ke ema jalo ‘ke a re ke sweditse
Ke ema ka ke thibogela thapelo
A Moruti Mogwe a re rapelele
Moruti wa a ka ke a go rapela
Ema o tlhalose moana-sebata
Re balele Baebele ya Modimo
Re balele lokwalo lwa ga Jošua
Kgaolo ya ntlha o e bale yotlhe
O bale le Pesalema ya botlhano
Temana ya ntlha le ya borataro
Archie Mogwe o tla ntsha sefela
Taneele o tla tsaya aleto
Morake a tsaya ntswe ja boraro
MmaDisele a kwala dikitsiso