Loso lwa ga Sir QKJ Masire
Correspondent | Wednesday June 28, 2017 17:36
Thoromo ya lefatshe sale ke dupelela
Tshikinyego ya maikutlo kgale ke kanoka
Seetebosigo ka sefefo o re tswela kae
Masire lesire bohutsana re bo apere.
Moranang ra nnang thoromo Botswana
Seetebosigo sigo ra latolelwa mogaka
Matlhabatlhakane re itebetse wa itelekela
Melomo ra itshwara, setsokotsane, thakaselemela wa lelemela
Magano Ketumile Joni wa Masire loso a mo ikgapela.
Lefatshe le gatsetse, Rra Gaone o bolotse
Matsubutsubu Phukwi wa diphefo o tla ritibatsa
Maikutlo Batswana re tla gatsologa.
Dipolotiking ga ke na kgang
Phapang tšhaba ya Botswana basupi
Bapaki fatshe je o le diretse gotlhe
Gotlhe Khama sale a go itlhophetse.
O diretse fatshe je go se tsapa le go fisang pelo
Bechuanaland, Mmamosadinyana o mo diretse
Botswana, Batswana o ba bereketse
A true Pan-Africanist, ka sekgoa ba go tsatsankile.
A principal architect of economic growth, ka tšhomi ba go tsotsonkolotse.
Bothusatautona jwa fatshe sale o bo kotame
Botautona jwa fatshe sale o bo ntse
Naledi ya Botswana seetsele e go tshwanetse
Tlotla kgolo tshupo ya tiro ntle tsa gago.
Ga ba bantsi ba dirileng jaaka wena
Botshereganyi mafatshe o a diretse
Ledi la Pula Masire o le dirile
Botswana Ketumile o mmusitse.
Tshwene marapo nnang wa banyana o ganne go e adima
Mafatshe dipolotiking o a thusitse
O a namotse dipolotiking di sa iketlang
Mozambique, Rwanda, D.R.C, Lesotho bapaki.
Dikgogakgogano di le magoletsa
Nkwenkgoga ke go goge go lwelwa setilo.
Botlhoko jwa go gogwa batho bangwe ba bo utlwa
Ya molomo ntwakgolo wa ba gakolola
Maraganateng a bana ba mpa o itse go tshereganya.
Nujoma o kile a go tsenya dingalo
Masire wa le supa le le fa
Nnyaa wa banyana wa mo gana
Sedudu ganang wa pala ka sone
Ka sone nnete wa swela dikano
Sedudu tlhaketlhake sa Botswana ra duduetsa.
Masire letlhale la matlhale, Tiger Kloof mopaki
Very Brave Or Very Foolish, buka e kwadilwe
Memoirs of an African Democrat bangwe re e badile
Motlotlegi Quett Ketumile Joni Masire robala ka kagiso
Q.K.J. kagiso tlhokwa di go robalele.
Seetsele sa botlotlegi o se filwe matshwanedi
Tlotla kgolo tshupo ya bonatla jwa go boeteledipeleng
Sir Quett Ketumile Joni Masire ina ba le manega
Lady Olebile Masire mohumagadi ba mo taya.
O makopanya-merafe, Masire re bone maloba
Maloba phitlhong ya go ntletsentletse
Go jwetlile go se gato jwa lonao
Selelo, khuranyo ya meno Gangwaketse.
Loso itumele mmatla sa gagwe o se bone
O re amogile Quett mmata go rile tu!
Loso re go senke ngwana wa phefo o re tswela kae
Matlhogojane ngwana wa lehuma loso tsamaela koo.
Loso re go senke re tswele ka kgoro
Lelemela loso re go batle thoko ga rona
Lelesela loso re go batle tlase ga rona
Monna o sa kgoreng falala re go tlhoke
Re go tlhoke khularo ya go keletso ya rona.
Morena, Masire mo sireletse go fitlha re kgatlhana
Mothatiotlhe, mo felegetse go fitlha re kopana
Morata-re-tshela-yo-o-molemo mmabalele
Timpakgolo ka phuka tsa gago mo khurumetse.
Robala Quett-a-Ketumile-a-Joni-a-Masire
Tsamaya mmina Phiri tlhokwa di go robalele
Tlhokwa di go robalele go fitlha re kgatlhana bobipong
Morwa Masire morafe o tla go gopola
Golo o go robetseng o bone phomolo.
Setsokotsane sa puo re go itse rotlhe
Karabo tsa gagwe ka puo motlhofo
‘Fatshe je ga se koi’bangwe ba gakolotswe
Puo e e borethe re tla anywa dikokomaneng.
(Motswedi: Lobebe lwa Ngwao. Ke lokwalo lo lo iseng lo gatisiwe. Le kwadilwe ke Kenneth Mogapi)