Maropeng go a boelwa

Sebofo Motshwane | Wednesday June 28, 2017 17:32

E re a beile tema, ke gone bana ba bone go ja. O ne a sa leme gope mo go kalo, fela, dijalo di ne di mo rata. Le fa a ne a ka baya tema tse pedi, tse tharo, o ne a kgona go ja ngwaga yotlhe, go se sepe se bana ba se tlhaelang kana ba se tlhokang. E re fa ngwaga e le one sentle, le mo ngwageng tse di tlang ba je tshupa.

Fa go ntse go tsweletse, ngwaga mongwe ke oo, wa tla ka go sele. Pula ya na, megoma ya tsena mo masimo ga lengwa.

A e tsaya yotlhe tshimo ya gagwe Kutlwelo. Fa a tswa mo go yone, ke e bile dijwalo di tla di mo setse morago. A tla mabele a ba a nna mogodiri. Fa a re a a oma, ya goroga thaga. Ya thibelela mo ga Kutlwelo, ya ne e kete ke ene fela a lemileng. O kile a re o leta jaaka a itse, ya pala nonyane, ya a somola. Fa go hudugwa mo masimo, go boelwa gae, ke ene a boa a iphotlhere.  Bana ba simolola go lala ka tlala.

  Kgang ya nna gore, seemo se ntse jaana, bana ba wela mo isong, go ka dirwa jang. Ba e kopanela. Fa ba kopanye, Kutlwelo a ntsha mogopolo wa gore, a tswe, a ye go batla tiro golo gongwe. 

Babelegi, e leng Mma Baleti, a gana mogopolo oo, a re, Kutlwelo a name a le mo gae, a lete letsema le le tlang. A gana Rra Baleti a re, ene ka se a se bonyeng ngwaga oo, ga a dumele fa a ka tlhola a roba sepe le fa a ka lema. A re, e le kae thaga; a leme, a e lemele, bana ba gagwe bone ba foforwa ke tlala? Nnyaa. Babelegi  o kile a re o a bua, a le supa le le fa Kutlwelo.  Ka Goo Kgang ga go jelwe sepe, Mma Baleti a felela a ineela; a re, Kutlwelo a dire se ene a bonang se ka nna botoka mo go ene. A itumela Rra Baleti, a bona fa a fentse kgang.

Go fetile malatsi a se kae fela, Kutlwelo a bo a rolela Babelegi mafoko a gore, o kopanye le tsala nngwe ya gagwe e tswa Phikwe,  ya mmolelela fa go na le madirelo mangwe koo, a a dirang diaparo, mme a batla batho.

Jalo he, o batla go ya go iteka lesego koo. Ka Babelelgi a ne a bona fa Kutlwelo a setse a feditse mogopolo, gore o batla go tsamaya, a se ka a ganana nae, a dumela gore a tsamaye.

Ka le le latelang, a laela, a tswa ka kgoro Kutlwelo, a leba Phikwe. O gorogile koo, a fitlhela tsala ya gagwe Pheretlhego.

A mo tsaya a mo isa kwa madirelong a  Fabrics and Textiles. Ya ne e kete e ne e ntse e mo letile tiro. Gone foo, a hirwa go nna modisa dikago. Kgwedi  tsa ntlha tse tharo, a e tlhagafalela a e dira. Le bana kwa gae a ba gopola, a nna a ba latlhelela sengwe.  Mma Baleti a itumela, a bona fa botshelo bo tlaa nna teng.

Owaii, ga ya kae?  A tlwaela mahulo Kutlwelo; a simolola go nna le ditsala kwa le kwa. Phafana le yone ya mo atamela. Ga nowa thata, madi ale a felela nageng. E re kgwedi e fela, Babelegi a solofetse go bona sengwe, a se ke a bone sepe. Fa malatsi a ntse a feta, ga oma, ga omela ruri. Bana ba boela ba lalela ka metsi. Babelegi a hakgamala thata.

Kwa tirong le gone ga nna ka go sele. Ka a ne a tlhola mo go tsone, a re o e ija dithata, tsa mo ineela dino. A simolola go tsena morago ga nako kwa tirong. Ka malatsi a mangwe, le go bonala koo, a se ke a bonale. Ga go a tsaya lobaka bahiri ba gagwe ba lemoga selo se, ba bo ba mmeela fa thoko. A a bona kae madi a go nwa le go itumedisa ditsala? A a tlhoka le tsone ditsala tsa tlhotlhorega. A sala foo, go se ope o mmitsang KTL, jaaka a ne a itsiwe.

Ga tla letsatsi la gore a ikakanye gore, seemo se ntse jaana, tsela pedi o tsaya efe. A bona go se epe tsela, fa e se fela gore a boele gae. Ga go a feta ape malatsi, a bo a bile a ikgata motlhala, a boela Lerulaneng. O gorogile koo go se motho mo go ene, a otlhegile, le fa e le diaparo di se yo. Ga a ka a nna le mafoko ape a mantsi.

A khutsa ka lengole, a itekodisa Mma Baleti, kgang a re o latlhilwe ke ditsala mme fela o rapela gore a  itshwarelwe, ka ga a felela nageng, o ne a gopola gore, maropeng go a bolewa. Babelegi a se ka a nna le epe kgang, a mo amogela.