Mmangwao o gopola Rre Rra Gaone
Correspondent | Wednesday June 28, 2017 17:28
Sir Ketumile o tlogela Batswana, le ditshaba, ka dikeledi tsa kutlobotlhoko.
Batswana ka go farologana ba supa ka mekgwa e e bonolo gore Rra Gaone e ne e le senatla sa monna e bile e le moeteledipele wa tlhwatlhwa.
Mongwe wa baboki ba teme ya Setswana yo o tumileng, mme e bile e le mosadi, Ditshupo Samakabadi, yo o itsegeng thata ka leina la ‘Mma ngwao Ya Setswana’ mo mererong ya Poko, a re ke mongwe wa batho ba ba hutsafetseng thata.
Samakabadi a re lefatshe la Botswana le ne le filwe monna wa senatla, e bile a le kutlwelobotlhoko le boammaaruri.
A re khutsafalo ya gagwe e mo gwetlhile go thama leboko ka Rra Gaone, seo e le go mo akgolela lorato le bopelonomi jwa gagwe, jaaka e ne e le molemi-morui le moeteledipele wa setshaba.
Mma Ngwao ya Setswana a re Batswana ba tshwanetse go leba kwa morago go latedisa motlhala wa dinao tsa ga Rra Gaone.
O dira jalo ka leboko le le latelang:
Ya re masa a a sa wa tlhaba mokgosi
Dikgosi tsa thaakanya ditsebe
Sa utlwala segalo sa ngwana le mogolo
Kgwedi ya Seetebosigo ya fifala ka seru
Keledi ga elela ya botlhoko jwa ntho
Mogolo pharatlhatlhe a bo a ineetse
Sebaka sa tshiano a se weditse.
Naledi ya masa e kile ya benya e sa fetse
Lesedi la yone le kile la phatsima
Banna le basadi ba ema kgalalelong ya lone
La akolwa ke mogolo le ngwana
La akolwa ke mohumi le mohumanegi
‘Sedi la Botswana Rre Rra Gaone
Le ntse le apesitse Batswana jotlhe.
O kile wa kgalema moana-phiri
Wa re botho thupa telele e fitlhang logageng
Thupa telele e kgotle pela dirope
E boe e kgotle mmadipela marago
Wa re botho setho sa Motswana
Botho maipelo re ipela ka jone
Bogwera go rupa jwa thupa
Thupa ga e gate lore lo kgopo
Molemo wa ngwana thupa
Thupa go fela ya kgomo go sale ya batho.
Rraarona tlhe rona boDitshupo re anywile
O ne o re tshwaetse e khunwana e sa kgaleng lobese
Kgomo o re file ya leradu maoto a sebokolodi
Kgomo khunwana ya go palangwa sepalamo
Ra e rwala khunwana dinaong
Ra e apara mebeleng ra a ja bothitho.
Rraarona tlhe re tlaa dika re go gopotse
Re go gopotse ka pina tsa kgalaletso
Pina tsa boipelo le lorato
Pelotshweu e ntsha lobelo
Pelontle leswalo e alafa mong.
Motse tlhe re feta wa balala
Wa baruakgomo re tsene ka one
O ne o le thothobolo e olelang gotlhe
Diphuka tsa gago di ne di phuthologile
Di tshwana koko e namagadi e bona ntsu
Wena Joni wa ga Masire o re khurumeditse.
Ga Maila wa re tsholela nama ra namalala
Wa re tlhabela kgomo dirwe tsa lekana
Kgotleng banna ba lekgotla ba a ja mokoto
Basadi lwapaneng ba a ja ngati
Tshimo wa lema e tona morwa Masire
Ra beeletsa ka sefalana ra tlatsa sesigo.
Mogaka o robetse ka kagiso Batswana
Phiri e ikhuditse ke letsapa
Lo se mo gopole ka pelo di ela madi
Lo se kgoberege maikutlo fa lo mo gopola
Opelang lo duduetse tiro tsa gagwe
Lo ipele lo galaletse Modimo
Lo re, ‘Ga o a re siya re le masiela,
Ga o a re tlogela fela moana phiri.’
Ga o a tsamaya fela Morwa Masire
Peo o e re tlogeletse o e jwadile
Re tlaa gata motlhaleng wa gago
Tlhako ya pele e bulela ya morago tsela
Motlhala re tlaa sala re latile wa gago.
Robala ka kagiso motho wa ga mokgalo o thebe.
Robala ka kagiso moana phiri
A tlhabi tsa lefatshe di itibale
Tiro o e dirile o e weditse
Tsotlhe tiro tsa gago di a itsiwe.