Kgwele ya kgarakgatshiwa kwa Kgatleng
Teichler Rankoa | Wednesday June 21, 2017 18:00
Fa ditlhopha di le mo phuthegong ya lekgotla le le tsamaisang merero ya kgwele ya dinao ko Kgatleng bosheng, bagolwane ba ditlhopha ba ne ba ngongorega ka fa komiti e e eteletsweng ke Clifford Mogomotsi e dirang dilo ka teng. Tota selelo segolo e le go tlhoka therisano fela e e bonalang, ba afa sekai ka phuthego e e neng ya tlosolosiwa ka ditlhopha di ne di sa bolelelwa nako e santse e le teng.
Kgang e nngwe e e mo tafoleng le ntswa tota e sa rarabologwe, ke e ditlhopha di ngongoregang ka se ba reng ke sa dirisiweng sentle ga madi, ba re kgang e bone e le bagolwane ba ditlhopha e a ba tshwenya, ka gangwe le gape fa pego ya madi e tshwanetswe go dirwa, ga e tlhaloganyesege gotlhelele.
Bagolwane ba ditlhopha ba boletse gore ba batla pego fela e e papa,etseng ya madi, bogolo jang ka motshwara madi ene a bolela gore madi ene ga a ise a ko a bone madi mangwe a go buiwang ka one, a go belaetsang a ile kwa kgetseng ya mongwe.
Mogolwane wa setlhopha sa Fast XI, Arthur Ntsomeng o ne a tlhalosa gore go botlhokwa thata gore komiti e eme ka dinao go ba tlhalosetsa e le ditlhopha gore go tsileng jang gore motshwara madi a seka a kopana le madi mangwe. A re ka na bone e le ditlhopha ba itse sentle gore madi a tshwantswe go neelwa motshwara madi gore a kgone go a arabele, a re ga go a tshwanela gore mongwe le mongwe fela a ise lebogo go tsaya madi a ntse a itse a sena tshwanelo.
Mafoko a a ga Ntsomeng a ne a tlatswa ke mogolwane wa Blue Vultures yo le ene a reng go botlhokwa thata gore dilo di dirwe ka thulaganyo, a re komiti e tshwanetse go itsosa ka gore tota dilo dingwe di a belatsa. Ba ne ba tswelela ba kopa gore a komiti e ne e leka gore fa go na le dikgang fa pele ga bone, ba di fedise ka bonako, eseng gore di emisidiwe gore liki e fele pele.