Rebels e bontshitse Yankees bontsho
Koketso Kgoboge | Wednesday February 22, 2017 14:46
Motshameko o, ke mongwe wa ya liki ya bokone e e rotloediwang ke kompone ya BoFiNet. Ditlhopha dile tlhano tsa Yankees, Rebels, Scramblers, Phikwe Comets le Carats, tsa bomme di akareditswe le tsone, go gwetlha ketapele mo metshamekong e.
Mo motshamekong wa yone le Yankees, Rebels e simolotse e tlhasela mo tikologong ya ntlha. E itlhoma ko pele ka dintlha tse supa. Se sa baya Yankees ka fa tlase ga kgatelelo ka ene ele bone ba ba kukileng molangwana mme ba retelelwa ke go kwadisa metabogo.
Mo tikologong ya bobedi, Yankees ba kgona go kwadisa di ntlha tse pedi ka Maatla Mpeba le Maithoko Monnawaletsatsi. Ya re fa beng gae ba re ba a itharabologelwa, Odirile Keabetswe wa Rebels a kgalema ka go tika dibolo tse di molelo, mme Yankees ba retelelwa ke go di sola molemo, go ba ntshetsa ntle.
Ya re ka sebaka sa bone sa go tshwara molangwana, Keabetswe a nna wa ntlha go kwadisa ntlha mo dinong tsa bone tse tharo tsa tikologo ya bobedi. Ntlha tse dingwe tse pedi tsa tsena ka Ndinaye Makajane le Samuel Lehepela.
Yankees ya oketsa dintlha ka ele nngwe ya ga Kagiso Thabano mo karolong ya boraro, fa Rebels yone ya nosa gape ka dintlha tse tharo go tswa mo go Tawanda Toitoi, Kebatang Prince le Chabaesele Phutiyarona. Motshameko wa fela ka tikologo ya bone fa Yankees ene e retelelwa ke go nosa.
Phenyo ya Rebels ya ba bulela dikgoro ko legatong la bobedi ba fetsa ba le mo maemong a bone, ele fa morago ga dithopha tsa Phikwe Comets le Orapa Carat.
Maemo a botlhano a eleng a bofelo a dithopha tse di tla gatelang pele a tshotswe ke sa Maun sa Deltas mme fela a tla netefadiwa morago ga motshameko wa Yankees le Carats mo bogaufing.
Ditlhopha tse di tlhatlhama setlhopha sa Mahalapye Rail Giants se e nnileng sone sa ntlha sa bokone go iponna phatlha morago ga metshameko e e neng e tshwaretswe kwa Mahalapye kgwedi eno e rogwa. Ka botlhano jwa tsone, di tla kopana le tse supa gotswa ka botlhaba ko legatong la bobedi.
Mokatisi wa Rebels, Mosalagae Radipotsane, o ne a itumelela katlego ya setlhopha sa gaabo morago ga motshameko wa bone le Yankees. O supile, fa tsotlhe di tsamaile ka bonokopila jaaka bane ba solofetse.
O supile fa ba nnile le bothata jwa go sireletsa mme a re batla baakanya phoso eo.
Mo go tsa bomme, setlhopha sa Rail Giants e nnile sone sa ntlha go fetela pele, se longwa serota ke Ghetto Yankees le Scramblers, fa sa maemo a bone, e tla nna se se tla fenyang magareng ga Raptures le Carats ko Serowe mo mafelong a beke a a latelang.
Borre
MaduO a A garetsweng a
mafelo a beke a eme jaana
Carats 10 - 0 Scramblers
Yankees 7 – 0 Scramblers
Comets 2 – 1 Carats
Scramblers 0 – 9 Rebels
Bomme
Yankees 5 – 4 Carats
Scramblers 9 - 4 Carats
Scramblers 4 – 5 Yankees
Carats 15 - 3 Comets