Go nwela ga Mendi � Kgaolo 4
Staff Writer | Wednesday February 15, 2017 16:51
A ile Mendi a nwetse mo lewatleng. Hularong sa gagwe ga sala matlhotlhapelo. Ke sone se e reng mmoki a bolela tiragalo e, a re:
Go Nwela Ga Mendi
A ga ea re mokgosi o dule moseja ole, Go le thata, tau tse ditona di lotlhanye;
Go le thata ya lentswe, ka banna ba sa robala.
Go bifile, ka ditlhaka di tshelepaganye;
Ga bolola mophato wa Mautlwakgosi mono.
Koloi ya metse, Mendi e sa le e hulara E paoganyana ka bone mawatle a magolo;
E phekile malatsi, ba gopotse ntlheng ya Fora, Le ene Fora o buiwang, ga ba a mmona le ka matlho;
Golo ba go ileng, go itse tlhapi tsa madiba.
He, bagaetsho, lalang ka ntlho madi a tshologa, Le pelo di gamuketse botlhoko, di tlaa fola.
Ba ile barwa-rra-rona, ga ba na go menoga;
Ba jelwe ke tau e sa sisimogeng motho mmala, Ba meditswe ke metse a se nang pelotlhomogi.
Go no go sa bolola gatlapa lepe nabo, Go no go ile bomorwa-loso-lo-dirwang fela, Banna ba tswang mogang thamo ya phala e hubitse, Banna ba tshwantshitseng bolalome le dibatana,
Thaka tse dikgolo tse di pelo di ritibetseng.
Ha mongwe a na a ba tlhasela lonyatsong A re ke bodisase ba ka mo tshoga seemo;
O na a tlaa thanya fela lomapo lo le tsebeng.
Mme ha le ene gongwe e le mosimane wa pholo, Bogolo go no go ka sa logong ga sala molora.
Mephato e boile, bone ba sa tlhokafala, Re saletse go oketsa diphatla ka diatla fela.
Bana ba Mautlwakgosi ba setse masiela, Le magae a bone a fetogile matlotla.
Masalela a bone a tla tswa mpeng tsa ditlhapi.
Go no go sa bolola ope yo boi le bone, Go no go ile banna ba ba sa tshabeng loso;
Banna ba ba tswang mogang go le thata, Banna ba ba neng ba tshwana le dibatana ka bogale,
Thaka tse di ne di sa tlalelwe-tlalelwe fela!