NACA e akgola BONEPWA
Nnasaretha Kgamanyane | Wednesday December 7, 2016 16:23
Kenosi o buile se jaaka a ne a bula semmuso bokopano jwa ngwaga le ngwaga jwa BONEPWA+ beke e e fetileng.
O boletse fa lekgotla la BONEPWA+ fela jaaka a mangwe mo Botswana a a itebagantseng le go thusa puso mo go lwantsheng mogare wa HIV le bolwetse jwa AIDS, a ne a lebanwa ke dikgwetlho tsa letlhoko la madi mme seemo sa dira gore mananeo a one a kgoreletsege.
A re o itumelela gore BONEPWA+ e kgonne go diragatsa tsotlhe tse di neng di lopiwa ke banaleseabe ba dithuso tsa madi le puso ka kemonokeng ya lekalana la NACA.
Kenosi o boletse gape fa mo dingwageng tse tharo, bogogi le botsamaise jo bosha jwa BONEPWA+ bo kgonne go fitlhelela ditharabololo tsa dikgwetlho tse di neng di lebane lekgotla le.
E ntse ele kwa bokopanong jo, Kenosi o ne a solofetsa BONEPWA+ le makalana a mangwe a puso a e ntseng e a ema nokeng gore puso ka kemonokeng ya NACA, a tlaa tswelela thusiwa ka madi le dithuso tse dingwe go imolol;a puso morwalo wa go lwantsha mogare wa HIV bogolosegolo thibelo ya one, bogolojang ka maikaelelo a maitlamo a boditshaba a 90-90-90-.
Kenosi o ne gape a nna le sebaka sa go baya pele batsenaphuthego ba bontsi jwa bone e neng ele maloko a mekgatlho ya batshelalemogare (PLHIV Support Groups) maitlamo a masha a mananeo a BONEPWA+ (Strategic plan 2016-2020).
Ya re a gakolola maloko a BONEPWA+, Kenosi a ba bolelela gore nako e gorogile gore lekgotla la bone le itebaganye le mananeo a a popota a thibelo kanamo ya mogare o mosha le mo go ba ba tshelang le one.
A re puso e santse e lemoga botlhokwa jwa BONEPWA+ . Ke ka moo e tlaa tswelelang e ema nokeng lekgotla le mo maitlamong a lone.