Banni ba lela ka mhero

Keagisitswe Dioka | Wednesday April 27, 2016 12:12

Jaanong o tletse mo masimong a dikgaolwana tseo, mme seemo se setse se tsere phekelo e sele e bile balemi bao ba dumela fa ele seru se se tlang ka dipeo tsa puso.

Fa a amogela balemi kgosana ya Samedupi, Rre Motlakaleso Ntopo o tlhalositse fa bojang joo, bo runya fela mo masimong. Are bo kgoreletsa maiteko a bone a temo le go ba ntsha gotlhelele mo masimong a eleng o ne ba itshekang ka o ne.

Molemi yo mongwe yo le ene a amilweng bobe ke bojang jo, Pelosera Ngande o tlhalositse fa bojang jo bo oketsega ngwaga le ngwaga mo tshimong ya gagwe. A re ka thuso ya balemisi, o dikile a itshwentse ka go lemolola chefi ee bolayang mhero mme maiteko ao a itaya se fololetse ka mhero o ntse o otsweletse ka go tlhoga.

A re thobo ya gagwe e wela tlase ngwaga le ngwaga ka ntata ya bojang jo. A re one a tle a leme Lablab a kgone go jesa leruo la gagwe gammogo le go rekisetsa ba ba sa lemang. 

Fa a ba kgwa dikgaba, molemisi yoo itebagantseng le dijalo mo kgaolong ya Maun Botlhaba  Keeme Jimmy o boletse fa le bone bojang jo bo sa ba robatse. A re ka jaana, ba setse ba sa itse gore bo tlholega kae le gore go tsile jang gore bo goroge mo masimong a balemi.A re le fa go ntse jalo, ga baa adima tshwene marapo ka ba tshweletse le go batlisisa ka bojang jo.

Le fa go ntse jalo, balemi ba ne ba rotloediwa go ela diolo tse di mo masimong a bone ka le tsone di ka baka motlhwa oo ka bakang tshenyo mo dijalong. Mongwe wa balemisi, Jane Diare o tlhalositse fa motlhwa oo tswang mo seolong o baka tshenyo ee maswe fela thata ka go kgaola thito ya sejalo go fitlha se wela fa fatshe.

O tsweletse a bolela fa seolo le sone fela jaaka ditshidi tse dingwe se tshela e bile se kgona go fedisiwa ka go epiwa. Are seolo se epiwa ntlheng ya botlhabatsatsi kwa go nnang mma le rra seolo.

Are morago ga go bolaya mma le rra seolo go godiwa molelo o motona go bolaya metlhwa e mengwe ee bitswang  masole le mapodisi ae leng one a bapalang dijo go tlisa kwa bagolong.Are go dira jalo ga go fedise metlhwa yotlhe mo tshimong mme oo tsamayang o ka fedisiwa ka melemo mengwe ee bolayang ditshidinyana jaaka blue death.E re go ntse jalo, Jimmy gape one a gakolola balemi gore ba seka ba lela gabedi. A re ba tshwanetse go lema dijo tsa leruo jaaka lablab go fema leuba le le tshwanang la ngogola le le tlogetseng barui mo legoeleleng.