Lobby Gee o kgwa molelo
Edward Pekenene | Wednesday December 16, 2015 16:09
Nnyaa tlhe! yo ke Gaone Fredricks Stones yo o tlholegang kwa kgotleng ya Xhosa 1 mo motseng wa Mahalapye mo kgaolong ya Legare. O tlwaelesegile thata ka leina la ''Lobby Gee.''
Fa a buisana le Naledi mo potsolosong ka bosheng, o tlhalositse gore le fa gone a tlholega kwa Mahalapye jalo, fela mo nakong eno o nna mo motseng wa Letlhakane mo kgotleng ya Nkosho mo Boteti. Lobby Gee Wa Masika, jaaka barati le balatedi ba mmino wa gagwe ba rata go mo reta, a re mmino wa gagwe o bidiwa Rasta-pantsola. A re Rasta-pantsola ke mmino o a o itshimololetseng ka boene mme o tlhamilwe ka go tswakanya meribo/metswako ya mebino e mengwe e e farologanyeng jaaka pop, reggae,disco,borankana le e mengwe.
A re ka ntlha ya gore ntsanyana ya maitaya sebata e bonwa mabotabotong, o sale ka a supile a sale mmotlana gore o tla nna moopedi, ka a ne a nna ka go tlhodia batsadi kgotsa bommata ba gagwe fa ba tshameka a opela dipinanyana tse di neng di tlhaloganngwa ke ene fela.
Lobby Gee wa dingwaga tse 32, o opela dipina tsa gagwe ka Setswana se se tlhololo e bile di humile molaetsa o o ka thusang batho mo matshelong a bone. A re o opela ka teme ya mo gae ka e le yone e e mo kgontshang go tlhalosa sentle tse a buang ka ga tsone. O gwetlhile banana ba badiragatsi gore ba tlogele go ekaeka diteme le dingwao di sele ba itlhokomolosa tsa mo gae.
A re o tlhama dipina a lebile ditiragalo tse di farologanyeng tsa matshelo a batho mme ka tsone a kgone go fetisa molaetsa o o botlhokwa mo setshabeng.
Monna yo o ne a simolola go tuma mo Boteti ngwaga ono morago ga go golola dipina tse pedi tse di monate tse maina a tsone e leng ''Batsomi'' le ''A gorogile'' ka setlhogo se se reng ''A gorogile masika.'' A re o ne a apaya dipina tseo kwa go ba PPN LINKS RECORDS kwa Letlhakane, fa lentswe lengwe le le tlhagelelang mo dipineng tseo e le la ga Kabo Matlho, fa setshwantsho sa kapetlana se tserwe ke Rre Reolebeng Diuzer Mokganedi.
''Ba ba batlang go ja monate ba ka ntshwara mo 76129184/73609267 go akola mmino o mosha wa Rasta-pantsola,'' ga bua Lobby Gee. O nnile bofefo go bolela gore o mo bothateng jwa go tlhoka madi go gola sentle mo mminong,o eletsa go bona thuso ya madi golo gongwe. Mo nakong eno Lobby Gee a re o apeile alebamo e e feletseng, o tla e ntsha mo bogaufing.