Bakgatla ba rekela Mma Matshego sukiri
Teichler Rankoa | Wednesday November 4, 2015 16:58
Fa ba bua mo phuthegong ya kgotla kwa Oodi bosheng, borre le bomme ba mophato wa Mangana ba ne ba bolela gore go tswa bogologolo, morafe wa Bakgatla o ne o itlhokomelela dikgosi tsa one go sa kgathelesege gore a dikgosi tseo di ne di na le eng go ka itlhokomela. Ba re se e ne e le go supa tlotlo le lorato mo go tsone, ka go rialo ba eletsa gore morafe wa Bakgatla o ikgate motlhala go tlotla kgosikkgolo le mohumagadi wa gagwe.
Erile mophato wa Mangana o rola kgang mo kgotleng, wa bolela fa Mokgatla mongwe le mongwe a tshwanetse go itse Kgosikgolo Kgafela a sa tlhole a bereka jaaka pele, ka jaanong a le mo tirong e tona ya go baakanya dilo dingwe tsa morafe wa gagwe. Ka a sa bereke, se se tlhalosa gore ga a sa tlhole a na le letseno le le tshwanang le ka nako ya fa a santse a bereka. Fela jalo le mohumagadi Mma Matshego yo o nang le monna wa gagwe kwa Aferika Borwa.
Mongwe wa Mangana a Oodi, Mabina Sakaeyo Setswammung, o ne a bolela botlhokwa jwa gore Bakgatla ba itlhokomelele Kgabo le mohumagadi, a re ke sone se bone ele Mangana, ba boneng go le botoka go rwala maikarabelo a go rotloetsa botlhe go thusa fa ba ka kgonang teng. A re ga ba kope sepe se setona mo morafeng fa ese fela gore a mohumagadi Mma Matshego a rekelwe senotsididi le sukiri ya keresemose.
Mafoko a a ne a tladiwa ke leloko le lengwe la mophato wa Mangana, Tlhabane Mooketsane, yo o neng a re le fa kgang e e le mogopolo wa Mangana, ga se gore ke ya bone, mme e le ya morafe otlhe wa Bakgatla.
Are bone e le Mangana ba dule fela ka mogopolo go o rekisetsa morafe wa Bakgatla ka ba itse fa kgosikgolo a eteletse morafe otlhe. O ne a kopa gore morafe wa Oodi le one o eme ka dinako go tsenya lebogo mo go emeng le Kgabo le mohumagadi ka dinako tsotlhe. O ne a tlhalosa gore se ke se se diragalang mo metseng yotlhe ya Kgatleng, le gone kwa Moruleng tota, eleng seo ba sa tshwanelang go salela morago e le morafe wa Oodi.
Bagolo ba motse le bone ba ne ba bolela fa se e le mogopolo o montle thata, o go seng Mokgatla ope yo o ka o ganang, ka e le yone tsela fela e morafe o ka supang ka fa o tlotlang le go rata kgosikgolo le mohumagadi wa gagwe ka teng.
Monnamogolo Ntuntu Molefe yo o reng ke wa mophato wa Lethulwa, o boletse fa kgosikgolo e le ngwana wa gagwe ka mophato, mme a rata thata go utlwa fa a tshwanetse go tlhokomelwa. A re ye ke yone nako e Bakgatla ba Oodi ba tshwanetseng go supa Bokgatla jwa bone. A re mongwe le mongwe a tsenye lebogo mo kgetseng a ntshe bonnye jo a nang najo go rekela Mma Matshego sukiri le senotsididi sa keresemose jaaka kgang e bolela.
Monna wa Lesoso, Phatsimo Lucas, le ene o ne a re mafoko a Mangana aa amogelesega. A re morafe wa Oodi o tshwanetse go itse fa Kgosikgolo Kgafela a o rata thata, bogolo jang ka o seke o mo swabisa ka gope. A a fa sekai ka matlwana a boithomelo kwa molapong, a a reng erile a agiwa morafe wa Oodi wa ntsha ditena, madi le disamente go thusa, a ba a re ba ne ba fetsa pele ga metse yotlhe. A re gape ba tshwanetse go itse gore le fa go rupiwa, Oodi o na le molelo wa gagwe, ga a kopane le motse ope.
Morafe o ne wa dumalana gore mongwe le mongwe mo motseng wa Oodi, le baagedi botlhe a ntshe P20, mme go kopiwa gore madi a a ntshetswe kwa dikgotlaneng kwa go nang le dikgosana tse di ka thusang go a tsaya.