Finnigan o tla a bolawa ke moretlwa
Teichler Rankoa | Wednesday July 29, 2015 15:41
Se ke se se diragaletseng batshameki bangwe ka ntlha ya go sa itshwareng sentle, go nyatsa le go betsa batshwaraphala.
Motshameki yo mosha wa mothomosweu go tswa kwa Ennyelane, Carl Finnigan, o ne a iphitlhela a tshwanelwa ke go tswela ntle pele ga motshameko wa setlhopha sa gagwe sa Township Rollers le Mochudi Centre Chiefs o ya bokhutlong ka ntlha ya go neelwa karata e khibidu.
Tiragalo e, e ne ya tla morago ga gore motshameki wa Centre Chiefs, Ayanda Molefe, a tswe mo lebaleng go tabogela kwa ntlwaneng ya boaparelo go baakanya borokgwana jwa ka fa teng ka bo ne bo sa tshwane le borokgwe. E rile go boeng koo, Molefe a itatlhela fela mo lebaleng go tswelela le motshameko ka jaanong a ne a apere jaaka molao wa bolo o laola, le fa tota a ne a sa fetola bokgwana jo, mme a bo gogetse kwa godimo.
Fa a goroga jaana, bolo yone ya bo e le kwa ntle ga lebala e ntshitswe ke Rollers. Erile e tshwanetse go latlhelwa, motshameki yo, Carl Finnigan, a e tsaya a re o a e latlhela. Fela, mothusa motshwaraphala a gana a mo lemotsha fa e le ya Magosi. Se sa kgopisa thata Finnigan mo a ileng a palelwa ke go itshwara, mme jaaka e le tlwaelo ya batshameki bangwe go nyatsa batshwaraphala le bathusi ba bone, o ne a ntsha mafoko a a botlha ka molomo wa gagwe.
Mafoko a a Sekgowa (Vokof le Fuck you kgotsa) a batshameki ba kwa moseja ba tlwaetseng go a raya batshwaradiphala, go lebega a ka se amogelesege gotlhelele mo lefatsheng la Botswana, ka erile fela a sena go rialo, bolo yone e tsena ka lebala, mothusa motshwaraphala a bitsa motshwaraphala ka bonako go mmolelela. Motshwaraphala le ene, erile go utlwa fa motshameki yo wa mothomosweu, ebile a le mosha gape e le mosimanyana a tlhapaditse mothusi wa gagwe, a ragoga ka lebelo go tabogela mo lebaleng a tsenya lebogo mo pateng. Bontsi jwa babogedi ba ne ba akanya gore o ile go neela Molefe karata go mo kobela ntle.
Se sa seka sa diragala mo go Molefe. Mme Finnigan a seka a dumela matlho a gagwe jaaka a ne a bona karata e khibidu e fofa mo phefong fa pele mo ponong ya gagwe. Ya re okare o a belaela, motshwaraphala a tsholeletsa lebogo kwa godimo a tshikhinya karata gore a bone sentle gore gatwe a tswe ka lebala go ya go tlhapa nako e sa le teng.
Gongwe Finnigan ene ga a itse gore mafoko a ke ditlhapa ka Sekgowa, mme se a tshwanetse go se itse ke gore a tswale molomo wa gagwe thata gore a seka a tloga a iphitlhela a tswa fa pele ga lekgotla la Setswana ka marago a le bothito morago ga go sekisiwa le go atlholelwa dithupa mabapi le tiriso ya matlhapa. Township Rollers e ne ya fenya motshameko o go nna bone ditshimega tsa kgaisano ya Kabelano monongwaga.