Mmegi Blogs :: Ke leo gape
Banners
Banners
Banners
Banners
Banners
Last Updated
Tuesday 17 September 2019, 18:10 pm.
Banners
Ke leo gape

Re itse gore e setse e le tiro ya ngwaga le ngwaga  gore e re ka kgedi ya Phukwi le Phatwe,  go  tshwarwa ditshupo tsa temo thuo mono Botswana.
By Sebofo Motshwane Fri 30 Aug 2019, 15:08 pm (GMT +2)
Mmegi Blogs :: Ke leo gape








Gape, jaaka re itse, ditshupo tse di simolola ka tsa dikgaolo di tshwarwe ka maelo ka go farologana ga one. Koo, go bonwe bontle le botswerere jwa  balemi le barui ba dikgaolo tseo ba ba gatetseng pele. Fa tse di wela, go latele tse dikgolo tsa Gaborone (National Agricultural Show).

Ba tshologele koo Batswana go ya go bona dikgantshwane le ditswerere tsa temo thuo tsa lefatshe leno. Bangwe ba ye koo go ya go tsaya malebela le go ithuta ka dilo makwati di kwatobololwa mo go ba bangwe. Ba bangwe bone ba re ba ya fela go ya go jesa matlho monate ka matlho dialana ga a je sa ga ope.  Go tlholwe koo, go le mherehere mme go le monate.

Gompieno re utlwa gore dingwe tsa ditshupo tse di neng tsa tshwarwa ngwaga ono ketsa Mahalapye.Go ya ka polelo ele, ditshupo di ne tsa bulwa ke tona ya Tlhabololo Banana Metshameko le Ngwao, Rre Dikgang Makgalemela, go le Matlhatso kgwedi ya Phukwi e le masome mabedi. Re a tle re re, fa tiro e tshwana le e, e le ya morafe, e a tle e tlhoke mogolo go e tiisa moko. Mme tona a le kwa, a tiisa ditshupo tsele moko jang?

Go bonala gore, go fetile dingwaga dingwe ditshupo tse di ntse di sa tshwarwe. Ngwaga ono, ke tseo tsa bonwa. Ga twe, tona a itumelela selo se, a kgothatsa komiti e e neng e di rulaganyetsa go tshwara ka natla. Go sale foo, a nyatsa fa tiro e, e ne e se ya komiti fela mme e ne le ya botlhe. Bao, e le bafe? La ga tona ya nna gore, ditshupo tse di tlhoka thotloetso ya baeteledipele ba motse, le gore, ga se tsa Mahalapye fela mme ke tsa metse yotlhe ya kgaolo potlana eo. Jalo he, metse yotlhe ya kgaolo e tshwanetse go thusa, ya tsenya letsogo mo go tiileng.

Re dumalane le mafoko a re re, tona o ne a bua jaana, a lebile Setswana se se reng, Kgetse ya tsie ke go tshwaraganelwa. Go ntse go ntse jalo, re re, gongwe bangwe bone ba ne ba iikgogela morago ba lebile gore ka ntlha e nngwe Motswana a re, ‘Motshitshi go gama o mmotlana o montsi o a diana’ a raya gore, tiro e dirwa ke batho ba se bantsi, e dirwa botoka go na le ya ba bantsi.

Ba le bantsi, gongwe ba diiwa ke modumo, go bua thata, kana, go lwela go dira selo se le sengqwe fa tse dingwe tsone di eme fela. Re re, nnyaa, e seng e le tiro ya morafe jaaka tsone ditshupo. Re re, eo, e tshwanetse go emelwa

Banners

ka dinao ke botlhe.

Go ya ka polelo ele, tona o ne a sa tsena ditshupo tsele a le nosi. Re utlwa gore, gape, go ne go na le bagolo ba bangwe mongwe wa bone e le Kgosi Duncan Segotsi wa Mahalapye. Ga twe kgosi le ene o ne a nyatsa morafe wa gagwe gore ga o a tlhagafalela ditshupo tsa one. Go bolelwa gore, ka letsatsi leo, a re o bonye badirela puso fela. Mo go tlaa raya gore, morafe o ne o le boutsana; mongwe a bo a ka re, e ne e le manotonyana fela.

Ale, jaaka re utlwa, ya nna mafoko a ga tona  ka ditshupo mme a fetela pele jaanong a bua ka yone temothuo tota. Ga twe, o ne a kaya fa temothuo e ka tlhatlosa itsholelo ya ba ya leretse Batswana ditiro. A re, puso e na le mananeo a ka yone e lekang go tsosa temo thuo a remeletse mo go la ISPAAD (Integrated Support Programme for Arable Agriculture Development).

A tswelela a nyatsa ba e reng ba se na go lema, ba hularele masimo ba se ke ba a tlhokomele. Molemi a bo a ka roba eng fa a dira jaana? Yoo, a itswele fela, a bowe kwa masimo a iphotlhere. Re utlwa gore, go kgothatsa balemi, tona o ne a re ba reetse dikgakololo tsa bomaitseanape ba bo ba leme ka ditsela tse di tsamaelanag le phetogo ya loapi. Re ntse ga re gope. Re ne ra okomela Dikgang (Daily News) mme ra fitlhela polelo ele ya ditshupo tsa Mahalapye mo go yone.

Fa e bega ka fa tona a neng a bua ka teng le balemi Dikgang Daily News) Phukwi 22 2019 ya re;

‘…..re tshwanetse ra tsaya…..ra sala morago….le go dirisa metlhale ya temo e e tsamaelanang le diphetogo tsa loapi.’

Kgang ya temana e re e nopotseng e ke gore, ka loapi ke leo le a fetoga, a balemi le bone ba fetole mekgwa ya bone ya go lema, ba leke e mesha. Bóemong jwa lefoko ‘mekgwa’ go dirisitswe ‘metlhale.’ Re setse re kile ra kopana le lefoko ‘ le raya mekgwa mme ra re, lefoko le, ga le kwalwe ka ‘l’; go kwala jalo ke phoso. Jaanong ke leo gape.

Ga re ke re ipone tsapa, re tlaa ipoeletsa re re  go kwala sentle, a re latlhe ‘l’ yoo re re, methale, e le bontsi jwa mothale. Fela jaaka re tle re re motho o dira dilo ka tsela nngwe, ka mokgwa mongwe, lefoko methale le ka dirisiwa boemong jwa ‘mekgwa, ditsela’. Re wele re re, a re se dirise ‘l’ yoo fa a sa tseneng teng.

Subscribe to our Newsletter
Banners
Banners
Banners


Mmualebe
Fri 30 Aug 2019, 15:08 pm
Fri 23 Aug 2019, 14:45 pm
Fri 16 Aug 2019, 15:54 pm
Fri 09 Aug 2019, 17:28 pm
Fri 02 Aug 2019, 12:50 pm
Fri 26 Jul 2019, 12:56 pm
Fri 19 Jul 2019, 12:56 pm
Fri 12 Jul 2019, 12:53 pm
Fri 05 Jul 2019, 13:56 pm
Fri 28 Jun 2019, 13:05 pm
Fri 21 Jun 2019, 13:52 pm
Fri 14 Jun 2019, 13:18 pm
Fri 07 Jun 2019, 12:10 pm
Fri 31 May 2019, 21:34 pm
Fri 24 May 2019, 14:58 pm
Fri 17 May 2019, 13:14 pm
Fri 10 May 2019, 16:09 pm
Fri 26 Apr 2019, 12:17 pm
Thu 18 Apr 2019, 12:54 pm
Fri 12 Apr 2019, 12:59 pm
Fri 05 Apr 2019, 12:34 pm
Fri 29 Mar 2019, 13:34 pm
Fri 22 Mar 2019, 13:00 pm
Fri 15 Mar 2019, 13:46 pm
Fri 08 Mar 2019, 12:59 pm
Banners
Banners
Subscribe to our Newsletter
have a story? Send us a Tip
Banners
  • Previous
    Next
    Masa Centre
    ::: Wednesday 18 Sep - Wednesday 18 Sep :::
  • Previous
    X-Men: Dark Phoenix
    Next
    Riverwalk
    ::: Monday 17 Jun - Saturday 17 Jun :::
    X-Men: Dark Phoenix
  • Previous
    Next
    Gamecity
    ::: Wednesday 18 Sep - Wednesday 18 Sep :::
Selefu
Let Them Go!!
Banners

gramstalker

Banners