Dilalome tsa Facebook di tlhasela Mahalapye

Kgakololo e e dirilwe ke Mookamela mapodise a Mahalapye, Suprintendent Isaac Mamadi, mo potsolotsong le Naledi bosheng.  A re go ikgatholosa dikgakololo tsa bone ka Batswana bangwe, go setse go ba baketse matlhotlhapelo, ka e rile bosheng basadi bangwe ba le bararo ba tsieditswe ke manweenwee a ba sa a itseng kwa Mahalapye.  Mamadi a re basadi bao, ba ne ba solofetswa go firisetswa matlo a boroko ntswa go sena nnete mo thulaganyong eo, e bile ba sa itse motho wa go nna jalo.

Mogolwane yo, o boletse fa bomme ba bararo ba, ba dingwaga tse di kwa tlase ga masome a mane, ba begetse mapodise fa ba tsieditswe ka go tseelwa madi aa kanang ka dikete tse tharo (P3,000), ke rre mongwe yo ba sa mo itseng ka maikaelelo a go ba hirisetsa matlo, mme ba bolela fa ba kopane nae mo facebook.